يعاني الكثير من الخريجين أو الأشخاص الذين يريدون تغيير مجال عملهم سواء من اختيار الوظيفة المناسبة لهم أو العمل الذي يحلمون به.
ويقدم مصطفى خليفة، استشاري تطوير الأعمال، 6 نصائح تساعدك في بداية مسارك الوظيفي وحتى تصل للوظيفة التي تحلم بها كما يلي:
1- “لازم تبقى عارف أن اختيارك للوظيفة بيبقى غالبا على مهاراتك الشخصية مش بالمعلومات اللي خدتها في الكلية، مع الوقت هتعرف أن المعلومات اللي درستها في الكلية تعتبر اساسيات، طبعا مهم أنك تبقى متمكن منها لكن الأهم أن يبقى عندك مهارات شخصية تؤهلك للعمل، زي مثلا القدرة على التعلم والالتزام والانضباط والعمل في فريق”.
2- “لازم تدرب كتير أثناء الدراسة سواء مدفوعة الأجر أو غير مدفوعة، لأنك بتستفيد بمعايشتك لطبيعة العمل وشكل الشركات وطبيعة التعاملات فيها، وده بيخليك تتأقلم اسرع في المكان اللي هتشتغل فيه، ده غير أنك هتتعرف على بعض المهارات اللي ناقصاك وهتحتاج تشتغل عليها وتتعلمها قبل ماتشتغل في أول وظيفة ليك”.
3- “كون شبكة علاقات سواء أثناء التدريبات أو بحضورك دورات تدريبية أو بحضور مؤتمرات وأحداث تخص مجالك، اتعرف على الناس واتكلم معاهم، وتواصل معاهم بعد كده في حدود التواصل الاحترافي زي أنك تطلب مساعدتهم في معلومة أو نصيحتهم بالنسبة لكتاب وهكذا”.
4- “خليك نشط على مواقع التوظيف الدولية زي linkedin والمحلية كمان، اكتب معلومات عنك بوضوح وتابع الناس اللي بتدي نصايح في مجال شغلك، ومن وقت للتاني شارك معلومة أو صورة عشان الناس دايما تبقى فاكره اسمك”.
5- “اكتب سيرة ذاتية بطريقة احترافية وفيها معلومات عنك وعن شخصيتك، مش مهم الهوايات ولا أنك عايز تشتغل في شركة دولية الأهم أنك تتكلم عن شخصيتك ومناطق قوتك وتكون مدعومة بالدليل اللي ممكن يكون هوايه مثلا أنك شخص مثابر وطموح وتكتب أنك كنت بتتمرن بشكل يومي واخدت بطولة معينة”.
6- “اعمل بحث عن مجالك في السوق والشركات اللي ممكن تشتغل فيها، اعرف ايه متطلبات وظيفتك المستقبلية وإيه ممكن يميزك عن بقية زملائك اللي ممكن يقدموا في نفس الوظيفة، اشتغل أنك تطور من نفسك وتتعلم المهارات المطلوبة”.