| ترجمة | محمد جادو |
الكاتبة | Kate Beckman
المصدر | Cosmopolitan
1. تقريبا مستحيل انك تقدر تنام بالنهار من غير إزعاج، وطبعا شكرا للمزعجين زى التليفون اللى ما بيبطلش رن، ده غير الخبط على الباب، او حد من اصحابك يكلمك عاوز يدردش معاك فاكرك فى اجازة، وحتى لو قفلت تليفونك، مش حتقدر تمنع صوت ماكينة جز الحشيش من عند جارك، او صوت منفاخ ورق الشجر، ولا صوت العمال اللى شغالين يبنو فى عمارة جنبك، ده غير ان كل الناس فى شغلها بالنهار، عشان كده لو عندك مامورية تعملها او مستنى حد من السنترال يصلحلك كابل التليفون المقطوع، فانت مضطر تحاول تفضل صاحى عشان تخلص الحاجات اللى انت محتاج تعملها.
2- انك تفوت على نفسك حاجات ممكن تعملها الا لو اضطريت تضحى بجزء من فترة نومك، والحقيقة هو شعور صعب لما تلاقى نفسك بتحاول تتواصل مع شوية الناس اللى صاحيين وانت فى ورديتك بالليل، مفيش قدامك غير انك تعمل صداقات مع زملائك فى العمل او تتواصل مع عمال وردية ليل زى حالاتك، يعنى تحاول تأقلم احوالك على ظروف شغلك، ومع كل ده، انت ما تقدرش تقبل اى دعوة على سهرة مع صحابك بالليل، او انك تحضر فيلم فى السينما حفلة تسعة، او حتى تحضر مسرحية، يعنى فرصك ضعيفة فى انك تعمل لنفسك جدول، فين وامتى؟ ولو انت اب مش حتقدر تشارك فى انشطة مدرسة ابنك لانها بالنهار!.
3- حتتعب كتير عشان تحافظ على علاقاتك مع الناس اللى مواعيد شغلهم طبيعية، وخصوصا لو حد عزمك على العشا صعب انك توصل فى الميعاد، ولو حيبت تتواصل بحد بالتليفون يا اما حيكونوا نايمين وانت فى الشغل او تكون انت نايم وهم فى الشغل ومش حتعرف تتواصل مع حد، انت حقيقى محتاج لاصدقاء او المقربين ليك يكونوا فاهمين طبيعة شغلك.
4- ولان فى نوعيات من الشغل تكون طبيعة الشغل فيها مختلفة عن التانية، فانت مضطر انك تناضل عشان تفضل صاحى، الساعة البيولوجية جوه جسمك تبعتله اشارات بانه لازم يكون نايم بالليل وصاحى بالنهار، وطبعا بتحس بتعب فى جسمك اثناء شغلك بالليل لانه من الواجب انك تكون نايم فى الوقت ده، لو انت شغال فى وردية ليل فى مستشفى، فمن السهل انك تسهر لانك ها تحس انك بتعمل حاجة مهمة، ولكن فى الوظائف اللى بتضطرك تقعد وتراقب لفترات طويلة – زى شغلة حراس الامن – حتلاقى نفسك “بتسقط” (يعنى راسك بتقع منك وعينيك بتقفل!).
5 – لو انت عايز تعمل حاجة يوم اجازتك غير انك تفضل نايم فى السرير، لازم تخطط لنفسك مواعيد للنوم، ده لو انت شغال وردية ليل خمس ايام فى الاسبوع، فانت لازم تاخد قرار لما يوم اجازتك ييجى، هل حاولت تلاقى حاجة تشغلك بالنهار عشان تقدر تنام بشكل طبيعى بالليل، أو، فى حاجة ممكن تعطلك وتلاقى نفسك سهران بالليل ومش لاقى حاجة تعملها؟ وربما تحتاج لشوية وقت عشان تخلص متطلبات ليك بالنهار، الحقيقة حتتعب جدا عشان تعرف تعمل اعادة ترتيب لمواعيد نومك.
6 – انك ترجع لشغلك فى وردية الليل بعد كام يوم اجازة مسالة حقيقى صعبة جدا، زى اى واحد بعد اجازة نهاية الاسبوع، انك تتكيف تانى مع طبيعة شغلك مش سهل ابدا، وصعبة جدا خاصة مع عمال وردية الليل، جسمك اتعود على النوم بالليل، وخصوصا بعد كام يوم من النوم الطبيعى، حقيقى صعب انك تعود جسمك تانى على السهر بالليل ومقاومة الشعور بالنوم.
7 – انك تسوق عربيتك بعد وردية الليل عشان ترجع بيتك يعتبر جنون، وكتير من الدراسات بتقول انك لو سوقت عربيتك وانت تعبان ونعسان اخطر من انك تسوق وانت سكران، كمان وانت سايق الساعة 7 الصبح بعد 8 ساعات سهر وشغل، حتلاقى نفسك وانت سايق راسك “بتسقط” وعينيك تبتدى تزغلل وتفقد تركيزك، واذا حصلك ده، استعين بحد من زملائك يوصلك، او اركن فى اى مكان وغمض عينيك ولو لتلت ساعة، من الافضل ليك انك تروح متاخر شوية احسن من انك تعرض نفسك لخطر الحوادث.
8 – علشان تقدر تسهر حتضطر تشرب اى حاجة فيها كمية كافيين ولكن بحساب، يعنى انك تشرب قهوة او اى مشروب فيه كمية كافيين يساعد جسمك على السهر، ولكن اذا شربت كمية كبيرة من الكافيين او تفضل تشرب قهوة طول الليل، جسمك حيتعود على السهر ولو روحت بيتك حتلاقى نفسك مش عارف تنام.
9 – ولو عندك اطفال، حتحتاج تقعد معاهم وتضحى بوقت نومك، أو انك تحاول تفضل صاحى وتستنى لو ناموا تنام معاهم، او تصارع النوم وتفضل صاحى عشان هم صاحيين وعايزينك تقعد معاهم، انت صحيح بالشكل ده بتوفر مصاريف داده تقعد معاهم وترعاهم، ولكن حتضطر تحرم نفسك من النوم والراحة وده حال الكثير من الاباء.
10 – ولو انت بتدرس فى كلية حتضطر تصارع علشان تقدر تحضر محاضراتك الصبح، ولو انت محظوط حتقدر توفق محاضراتك عشان تكون فى وسط النهار وتقدر تنام شوية بعد رجوعك من وردية الليل، ولكن لو محاضراتك مواعيدها بعد نهاية ورديتك حتبقى عامل زى الطالب الكسلان اللى رايح محاضرته الساعة واحدة الضهر.
11 – عمال وردية الليل بعد فترة طويلة من العمل بيعرضوا نفسهم لخطر الامراض، وده لانهم فى صراع يومى عشان يفضلوا صاحيين ويقوموا بشغلهم، وده بيخليهوم يشربوا حاجات تديهم طاقة وسكريات كتير او يدوروا على الاكلات الجاهزة السريعة، وعلاوة على عدم كفايتهم من النوم، وده بيعرضهم لامراض ضغط الدم والسمنة، حسب تقارير المؤسسة الوطنية للراحة النفسية، اللى بتقول ان قلة النوم لعمال وردية الليل بتعرضهم لمشاكل التمثيل الغذائى وامراض القلب، ومشاكل فى الجهاز الهضمى والسمنة.
12 – العمال اللى بيشتغلوا فى مواعيد عمل طبيعية مش ممكن يحسوا بصعوبة شغل عمال وردية الليل، فى بعض الناس انسحبوا من ورديات الليل فاكرين انهم عارفين ازاى يسهروا فى وردية ليل، او مش فاهمين ازاى يقدروا يناموا طول النهار، ده لو قدر ينام من 8 الصبح لحد 4 العصر، الحقيقة ان الامر محتاج شئ من القوة والصبر والتحمل عشان تقدر تفضل صاحى الساعة 4 الصبح ليلة بعد ليلة فى الوقت اللى الناس كلها بتبقى متعمقة فى النوم وانت قاعد تشوف الشمس بتطلع قدامك وتبدا تجهز نفسك عشان تروح وتبدا يومك يا تحاول تنام يا تروح كليتك او تحاول تقضى وقت مع عيلتك، انت عارف ان المسالة مش سهلة، لكن الامور حتعدى، وكل الحكاية انك حتشرب شوية قهوة زيادة.