أثارت مبادرة الرئيس عبد الفتاح السيسى ترحاب جميع المواطنين.. يعنى الراجل اتبرع بنصف مرتبه بخلاف نصف ثروة ابيه.. يعنى الناس عرفوا حقيقى ان البلد فى ازمة وعمالنا بالطبع هيقدروا الدور ده، والصوت يوطى شوية وخاصة الجماعة اللى تحت واللى ماوراهومش حاجة غير تهييج العمال.. واتحاد العمال اتبرع بـ 5 ملايين جنيه وطرح كمان فكرة التبرع بأجر يوم للعمال بشقين مهمين.. اولا: اختياريا علشان الجماعة اياها طبعا اكيد مش هيتبرعوا.. وثانيا: يوم على اساس المرتب علشان كمان ميحصلش زى يوم التفرع لفترة وكله فى صندوق (تحيا مصر).
ده كمان غير الوزير محلب رئيس الوزراء اللى خطى نفس خطوات رئيسه.. المهم ان الشق الثانى هم رجال الاعمال اللى اكيد القرش عزيز عليهم جدا وبقولهم من دلوقتى “ادفعوا بالتى هى احسن” والا الوش التانى هيطلع يعنى لكل رجال الاعمال اللى تربحوا فى عصر مبارك على حساب الغلابة لازم يشاركوا فى هذه الحملة لان اموالهم اغلبها لموها على حساب الناس الغلابة وبلدهم فى ضيقة ولازم الايام الجاية تقف على رجليها رضيتم ام لم ترضوا…
ونقولها بصراحه هو نظام مبارك وقع ولما سلم دقنه لرجال الاعمال اللى خربوها وجابوا درفها ومعروف بعد كل ثورة بتصادر جميع اموال وممتلكات اصحاب الازمة وفعلا اصحاب الازمة الحقيقيون هم رجال الاعمال المقربون من النظام السابق وكل دول معروفين بالاسم واحنا مش عايزين نقول مين ولا مين.. علشان بصراحة فيهم ناس كويسين ووطنيين علشان الكل ميتحطش فى سلة واحدة وهو اللى على راسه بطحة.. وكلمة اخيرة كتبتها بعنوان المقال “ادفعوا بالتى هى احسن”.
المصدر | جريدة العمال